Тукайның туган көне  татарлар яшәгән бөтен төбәкләрдә Туган тел көне, Шигърият бәйрәме буларак билгеләп үтелә. Бөек шагыйрьне апрель аенда милли җанлы һәркем искә ала. Аның шигырьләре, моңлы бер җыр кебек, гасырлардан гасырларга күчеп, күңел кылларын тибрәндерә. Казан шәһәре Совет районының Абдулла Алиш исемендәге 20 нче гимназия укучылары күңелендә дә – Тукайлы шигърият,  иҗат рухы яши.  28 апрельдә алар тарафыннан  «Туган телем - Тукай теле» исемле әдәби-музыкаль кичә оештырылды. Кичәдә 1-8 сыйныф укучылары Тукай  шигырьләрен сәнгатьле итеп яттан сөйләп, әкиятләрен сәхнәләштерделәр. Чарага Роберт Миңнуллин исемендәге Республика балалар китапханәсе Г. Тукай китапларыннан торган "Күчмә күргәзмә" белән килде. Күргәзмә әдәбият сөюче дусларыбызда зур кызыксыну уятты. Милли әдәбият һәм туган якны өйрәнү бүлеге җитәкчесе, филология фәннәре кандидаты Насыйбуллина Нуридә Шәйдулла кызы үз чыгышында Тукай әсәрләрен һәм туган телне белү мөһим булуын ассызыклады, чарада катнашучыларга һәм аны оештыручы татар теле  укытучыларына рәхмәтен белдерде. Гимназия директоры Рәхимә Миневәли кызы Арсланова Тукай турында үзенең шигырьләрен укыды һәм шагыйрь әсәрләрен сәхнәләштерүдә катнашкан укучыларны бүләкләде. Кичә югары дәрәҗәдә үтте һәм татар халык гимны - "Туган Тел"не башкару белән тәмамланды ... Читать дальше »