Казан шәһәре Совет районының Абдулла Алиш исемендәге 20 нче  гимназиясендә халкыбызның гореф-гадәтләрен, милли традицияләрен саклау максатында төрле чаралар уза. 12 нче май көнне гимназиядә халкыбызның милли бизәкләрен, орнаментларын, чигү үрнәкләрен үз эченә алган  "Милли мирас” музее ачылды. Бу музейда танылган дизайнер Флера апа Калмурзинаның кул эшләре: энҗе-мәрҗәннәр белән  чигелгән калфаклар, сөлге-яулыклар, мендәр өслекләре белән бергә, укытучыларыбызның,укучыларыбызның  да кул эшләре  урын алды. Гүзәллек  музеен ачу тантанасыянда КФУ ның Педагогика һәм методика институты профессоры, академик, дәреслекләр авторы Әнвәр Нуриәхмәтович Хуҗиәхмәтов, Америкада яшәп иҗат итүче тәрҗемәче Сурайя  апа Гайнуллина, "Милли мөхит” иҗтимагый оешмасының җитәкчесе Энҗе Даутова, режиссер Равиль Тумашевның сеңлесе Зөмәрә ханым, Флера апа Калмурзинаның туганнары, дуслары, гимназия укучылары, укытучылары катнашты.

Сәйләннәрдән,энҗе-мәрҗәннәрдән
Бизәк арты бизәк үрелә,
Күңелләрдә туган милли хисләр
Чәчкәләргә, гөлгә  күмелә.

Бу гүзәллек кайдан килгән?- дисез,
Туган бит ул алтын кулларда.
Халкым бизәкләре югалмасын
Төс салмасын озын юлларда.

Милли мирас -татар милләтенең
Алтыннардан кыйммәт җәүһәре,
Буыннардан буыннарга күчкән
Иң кыйммәтле затлы ядкаре.

              Рәхимә Арсланова,
"Абдулла Алиш исемендәге 20 нче гимназия” директоры,
К.Насыйри премиясе лауреаты