Балаларны татар әдәбияты, сәнгате, мәдәнияте, тарихы, халкыбызның гореф-гадәтләре, милли йолалары белән таныштыру, иң беренче чиратта, татар теле һәм әдәбияты укытучыларына йөкләнә. Әдәби мирасыбызны барлап, энҗе бөртегедәй саклап, киләчәк буынга җиткерү - ул безнең иң мөһим мәсьәләләребезең берсе.

     Һәр укытучы үз фәненә булган мәхәббәтен, белемен балаларга җиткерергә тырыша, укучыларның иҗади сәләтен үстерүгә зур игътибар бирә. Үзе янып эшләсә генә укытучы балаларны да "яндырып”, үз фәненә кызыксыну уята ала, язучы, шагыйрьләребезнең иҗаты белән таныштырып, укчыларны да иҗатка тарта, сәләтләрен үстерү өстендә эшли.

     Районыбызды инде икенче ел рәттән Әниләр көненә багышланган шигырь язучылар бәйгесе үткәрәбез. Елдан-ел бу бәйгедә катнашучылар саны арта. Әлбәттә,бу укытучыларыбызның тырыш хезмәт нәтиҗәсе. Димәк, алар балаларга дөрес юнәлеш бирәләр. Укучыларыбызның иҗат җимешләрен "Сабантуй”, ”Ялкын” кебек газета-журналларда күреп шатланабыз. Укытучыларыбыз арасында да иҗат белән шөгыльләнүчеләр аз түгел. Шигъри җанлы мөгаллимнәребез, әлбәттә, үзләрен күренекле шагыйрләребез белән бер баскычка куймыйлар. Ләкин татар теле һәм әдәбияты дәресләрендә язган шигырьләрен кулланып, уку процессын тагын да җанландырып җибәрәләр.

     Узган елның апрель аенда районыбызның мәгълүмати-методик үзәгендә иҗади эшләүче, каләм тибрәтүче укытучылар җыелды. Киңәшмә ахырында татар теле һәм әдәбияты укытучыларының иҗади берләшмәсен оештырырга булдык һәм аны "Илһам чишмәсе" дип атадык. Оешмабызда узган ел сигез укытучы булса, быел тагын өч укытучы өстәлде. Бу оешма нигә кирәк булды дисезме? Аның мөһимлеге, беренчедән, бер-беребез белән аралашу булса, икенчедән, иҗат белән шөгыльләнү өчен бер этәргеч, татар телен үстерүгә юнәлтелгән бер адым. Чөнки шигъри җанлы укытучыларыбыз районыбызда узган чараларда гына түгел, ә шәһәр, республика күләмендә уздырыла торган чараларда да катнашалар. Узган ел Г.Тукайның туган көнендә бөек шагыйребез һәйкәле янында үткәрелгән шигырь бәйрәмендә чыгыш ясадылар, ”Татарстан” радиосы аша үзләренең иҗат җимешләрен тамашачыларга җиткерделәр.

 

 

 

Арсланова Р.М., Гарифуллина Г., Сабирзянова Р.Р., Хафизова З.М., Минзязова З.А.